Umurage

Umurage

 

Iyumvire maze untege amatwi kibondo cyanjye

Dore ubungubu umaze gukura reka nkwibwirire

Ibyo nkubwira aha, ntuzabyibagirwe

Bizagufasha mu buzima bwawe kibondo uramenye.

 

R/ Cyo mwana wanjye ngaho ntega amatwi

Abantu b’iyi si turarushya

 

Ubona umuntu anyuze aha yiruka n’imodoka

Ukabona undi ahanyuze yiruka n’amaguru

Bikakuyobera uti mbese barajya he

Bareke bagende kibondo cyanjye uzaba uhamenya.

 

Ubona umuntu afite amamodoka afite amazu

Nyamara ukumva avuga yiganyira ngo arakennye

Ukumva arabeshya, burya ntaba abeshya

Ahubwo ni uko ubukire bwo ku isi ntawe ubugeraho.

 

Kubona umugabo afite abagore batatu bane

Nyamara akarenga akajya gusenyera mugenzi we

Bakaba batanu, cyangwa se barindwi

Ibyo byose biterwa no kwifuza kibondo uramenye.

 

Iyo wumva ngo kanaka azirana na mugenzi we

Ntibaba babuze icyo  bapfa nyamara cyoroheje

Ntukabyivangemo, jya unyura iruhande

Urwango rw’iyi si kibondo cyanjye ntiwarushobora.

 

Ujye wumva bike kandi uvuge bicye mwana wanjye

Ujye urora bicye kandi ntukagire amatsiko

Ikindi ukundane, ntugahemuke

Ibyo byose nubigeraho mwana uzaba umugabo.

 

R/ Cyo mwana wanjye ngaho ntega amatwi

Ibi nkubwira aha urajye ubyibuka

 

Nujya ubona ubabaye ntukamwirengagize

Yaba uwawe cyangwa se uw’abandi jya umumenya

Jya ukorera Imana ntugahemuke

Kuko nawe ntiwamenya icyo iminsi yakuzigamiye.

 

Uzabana n’abantu beza mwana cyangwa babi

Urajye wirinda abazajya bakoshya ubamenye

Jya wanga umugayo, kandi urabe intwari

Naho ubundi mwana wanjye iyi si ntabwo wayishobora.

 

 

 

 

 

 

 

Usize nkuru ki?

 

 

Urabeho mugenzi,

Wowe ushoje urugendo

Ukaba usize abandi

Kandi mwarafatanyaga

Cyo genda amahoro

 

R/ Fori se ariko X2

Waba usize nkuru ki i musozi?

Aho ntiwaba ugiye wari ruvumwa!

 

Amashuri warize

Amatungo waroroye

Washatse amafaranga

None byose urabisize

Cyo genda amahoro.

 

Mbwira ngaho cyo mbwira

Barumuna bawe

Wabahuguje amasambu

Mwahura mugashyamirana

None urabasize.

 

Wa muturanyi wawe

Wahoraga uhiga

Umwifuriza ibyago

Nyamara we akakwikundira

None uramusize.

 

Wirutse ku ifaranga

Ukarara utagohetse

Na ryo riraguhira

Ntiwagize uwo urihaho

None urarisize.

 

Dore nk’iriya mfubyi

Wiciye ababyeyi

Yandaraye uyireba,

Nta mpuhwe wayigiriye

None urayisize.

 

 

 

 

 

 

 

Usize nkuru ki?(suite)

 

 

 

Dore ziriya mbabare,

Zitatutse Imana

Wowe waradamaraye

Ntiwibutse gusangira

None urazisize.

 

 

 

Wahemukiye benshi

Ufungisha benshi

Kandi ubaziza urwango

Abasangirangendo

None urigendeye.

 

Warangwaga n’urwango

Ishyari n’amatiku

Inzika no guhora

Kwirata no gusuzugura

None urigendeye.

 

Wari umurozi wica

Dore wari igisambo

Wari umwanzi w’amahoro

Utashye bapfa kurira

Cyo ngaho igendere.

 

Ari jye rero si uko

Nasiga bahogora

Kuko nabaye intwari

Ndangwa no kwanga umugayo

Nkabona kwigendera

 

R/ Fori se ariko, x2

Naba nsize nkuru ki i musozi?

Aho sinaba ngiye ari nawe ubishaka!

 

Mu rugendo rwo ku isi

Nahorana urukundo

Kandi nkanashishoza

Ndangwa n’ubukiranutsi

Nkabona kwigendera

 

 

 


 

 

 

Fagitire

 

 

Abandi baragenda maze wowe ugasigara

Abandi barahomba nyamara wowe wunguka

Ibyago bigatera wowe ukinzweho ukuboko

Iyo mana yawe igukunda bigeze aho

Ukarenga ugacumura wibwira ko itabona

Ubonye fagitire yayo

Iriho sinyatire yayo

Ndetse iriho na kashe yayo

Mbwira se mugenzi wamenya uyihera he?

 

Ndibariza mirenge utunze nka salomo

Wubatse utugorofa, yigurira utumodoka

Aho agiye akagerayo, aho ashatse akahicara

Uwo muhinzi rero ukugaburira

Wirirwa akugokera, agasarura ufungura

Ibyo guhinga abiretse,

Akishyuza abo avunikira

Akabasinyira fagitire

Iriho kashe y’umworozi

Mbwira se mirenge wamenya uyiriha iki?

 

Cyo se na we mutegetsi wize ukaminuza

Uwo ushatse ukamubona ugushatse akakubura

Ukamamara i Rwanda n’i mahanga ukagerayo

Aho uribuka mwalimu waguhaye ibyo byose

Kaminuza uyirangije uti koko nzi ubwenge

Ukajyaho rero ukidoga

Uwo mwalimu ukesha byose

Agukoreye fagitire

Mbwira se mutegetsi wayishyura izihe ngingo?

 

Ejobundi warafashwe urerembura utuso

Abaturanyi bawe bakugeza ku bitaro

Uhasanga umuhanga agusubiza umwuka

Nk’uriya muganga ubona angana na nde se?

Ko nyamunsi adatugirwa akarenga akamwambura

Ubonye rudonanse ye

Ayihinduye fagitire

Akayijombagura udushinge

Mbwira se murwayi wakura he farumasi?

 

 

 

 

 

 

 

 

Fagitire (suite)

 

 

 

Bariya babyeyi, bariya bakambwe

Bakureraga ubarushya nyamara baragukuza

Bakuvana ku kwezi none umaze imyaka

Abo ba nyogosenge, abo ba nyokowanyu

Bakoreraga urukundo bakoreraga Imana

Humura ntibabirota

Ngo bakwishyuze ibere wonse

Ngo bakwishyuze rwa rukundo

Ariko se bibaye wakishyura iyihe nkunga?

 

Wirirwa uparangana ugacyura utwo ubonye

Bwakwira ugataha ugakinga ugakomeza

Wabona bukeye uti amahoro ndayafite

Bariya baturanyi bariya bapolisi

Baguhaye ayo maharo bagusaba kuyabaha

Uriya mugaba w’ingabo

Agukoreye fagitire

Iriho sinya y’abayobozi

Iriho kashe y’abayoborwa

Mbwira se mugenzi wamenya uyihera he?

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Ni uko tubaye nyine

 

 

Ubona inshuti mukabana, ugasanga ari nta makemwa

Ugashishoza ukabona mubanye nk’uko bibiliya ibibasaba

Bwatera kabiri ahari urukundo hakimukira urwango

Ugatangazwa n’uko uhemukirwa na wa wundi ntamakemwa

Burya rero yagomeraga abandi wowe ukumva bamubeshyera

Wabibona utyo nawe ukihorera uti koko rubanda ni babi.

 

R/ Rubanda ni babi kandi nawe uri we

Burya ubona duhura tukaramukanya

Burya ubona tuganira tugaseka

Twese duharanira kujya mbere

Abantu ni uko tubaye nyine

 

Nawe se wigeze wumva inyamaswa igira ibinyoma n’amatiku

Hari iyo wigeze wumva iroga ubutamikano cyangwa ibisazi

Mbwira ko wigeze wumva inyamaswa ijajwa cyangwa imena ibanga

Mbese hari iyo uzi yimura imbago ikaburana amahugu?

Ibi byose ni twe tubikora nta nyamaswa nzi yabikoze

Wabibona utyo nawe ukihorera, uti koko rubanda ni babi.

 

Basigaye bakingisha ibyuma, bagashyiraho n’abazamu

Basigaye bugariza ingufuri bakabika no mu mitamenwa

Dore basigaye bakora imyuka ihumanya inshuti zabo

Dore basigaye bakora intwaro zimwe bita iza kirimbuzi

Abantu tuzatera imbere twese cyangwa tuzarimbuke twese

Ni twebwe tuzaba tubikoze, ni ukonguko tubaye nyine.

 

Bariya basazi birukanka na twe tukirirwa tubaseka

Bariya bapfakazi duhuguza tukabazengurutsa mu nkiko

Bariya babyeyi babyara nk’abandi, nyamara bo ntibaheke

Ziriya mbabare z’amako yose zihinguka tugakinga

Ibyo byose ni twe tubikora, ni ahongaho tubera babi

Tugize urukundo rutibanza, abantu b’isi twagira ubumwe.

 

Amatwi yawe yaguhaye byinshi ngo hirya yo hino biracika

Ibihugu bihora birwana, bipfuye abayobozi babyo

Amarira ajya imbu kujya imbere n’imivu y’amaraso menshi

Ababishoje basinziriye ingorwa zishirira ku icumu

Abantu koko tugira urwango nyamara ntawe rwanditseho

Umenye ko umwiza kuri wowe hirya ho baba bamuvuma

Umenye ko umubi kuri wowe hirya aba yarahawe intebe

Ni ukonguko tubaye nyine, ni ahongaho tubera babi.

 

 

 

 

 

 

Urwiririza

 

R/ Urwiririza urwiririza we

Nyamara urwirungu rwa nimugoroba

 

Umwanzi ukwanga umwanzi ukwanga we

Umwanzi ukwanga Rwanda nziza we

Aragahinga ku  rutare

Maze asarurire ku rutaro.

 

Mbe wa mukobwa Kiberinka

Ko bamubajije ngo agiye he?

Ko yabashubije ngo azaza ejo

Naramuka ataje bazihebere.

 

Cyo ngwino urare ngwino urare we x2

Cyo ngwino urare Kiberinka

Nyabusa ngwino urare uzaherekezwa.

 

Uriya mwana aje kwenda iki?

Ko naherutse musezera

Ko yanshubije n’ikiniga

Ati nibutse yuko uwaraye adataha.

 

Na wa mukobwa ukora muri bara

Ko bamubwiye ngo nyina ararwaye

Ko yabashubije ngo bazamurwaze

Nakira bamucyure napfa bamuhambe

 

Na ka gasaza k’i Bumbogo

Kabwiye Ngenzi gushora inka

Kihina mu nzu gahaze urwagwa

Kambura umukazana umukenyero we.

 

Imbeba yiboneye agasheshe

Maze iranyaruka irakisasira

Ishaka akandi irakiyorosa

Iti: “inkuru ziragenda nzaba mbarirwa”.

 

Na wa mugaragu wa nzapfa urundi

Ko bamubajije ifuni ihamba

Ko yabashubije abarangira

Ati: “uwonguwo muhamba ni we uyiheruka”.

 

Na wa muhungu Mbarubukehe

Ko bamutose ngo ajye kuvoma

Ngo kandi abanguke barike

Ati: “uwanjye muwumpe ngende nywurumanga”.

 

 

 

 

 

Urwiririza (suite)

 

 

 

Igikeri cyatanze imirizo

Giha inyamaswa ziriruka

Giha inyoni zirigurukira

Gishatse uwacyo iba yashize

Kiti; “ibyaribyo byose nzajya mu ijuru”.

 

Na wa mukecuru rukukuri

Ko bamubwiye iby’umusaza we

Bati “imbogo yamwivuganye”

Ko yikomereje gutora inda

Ati: “ibyo byo ndabizi arayitahana”

 

Na wa muhungu w’umworozi

Yajyanye amajyi kuyagurisha

Bati: “turagura ayo twumva aryoshye”

Ko bayariye bakayamara

Agasubira iwabo akica inganda ye.

 

Na wa mubyeyi Nyirangirente

Ko bamubwiye kugura isuka

Ahubwo akigurira inkangaza

Maze bwacya ati: “bwaki yamariye abana”

 

 

 

 

 

 

 

 

 

 

 

 

 

 

 

 

 

Ntamakemwa

 

Iriya ntero yateye yewe ntamakemwa

Ikikirizwa na buri wese

Ngo uru byiruko rurananiranye  “

Nibabareke rero rubyiruko

 

R/ Ntamakemwa twamunganya iki?

Twamunganya uburere bwiza

N’umuco mwiza yasanze mu Rwanda.

 

Babaziza ko mwihaye ubwigenge

Babaziza ko mutakibubaha

Ngo muratoroka mukajya mu mujyi

Ngo mukaba mutakigira isoni

Nibabareke rero rubyiruko.

 

Babaziza ko nta kinyabupfura

Ngo iyo musohotse muza nijoro

Ngo mukamagana umuco w’iwanyu

Mugahesha agaciro uw’i mahanga

Nibabareke rero rubyiruko

 

Babaziza ko mwigira muri suware

Babaziza ko mwambara ibigezweho

Mukabanza ibyo abandi baherutsa

Mutamura inzobe imisatsi inyerera

Nibabareke rero rubyiruko.

 

Abo babivuga nimubakunde

Mubakundire ko babivuga gusa

Nyamara muba mubikora barora

Bagahimba babamagana gusa

Nibabareke rero rubyiruko.

 

Ejobundi waraye muri suware

Uri kumwe na se wa mimi na fifi

Aguha udufaranga uriha ishuri

Uwo na we ati urubyiruko rw’ubu

Nibabareke rero rubyiruko.

 

Iyo kanzu nziza igurirwa he?

Wayihawe na sebukwe wa mariya

Igihe muvana muri pariki

Uwo na we ati urubyiruko rw’ubu

Nibabareke rero rubyiruko.

 

 

 

Azahozwa na nde?

 

 

Amarira ye afite ishingiro

Ko ari wowe yahojeje

None ukoba umuhogoje

Ubwo azahozwa na nde?

 

Yabaruhiye adashaka inyungu

Abajyanama bawe gito

Babatanyije ngo afite abandi

So na nyoko bamufata nk’inzigo

 

Ese we nkwibarize, azahozwa na nde?

 

Ujya kugenda waranyonyombye

Musakiranye uramusiragiza

Umuha rubanda agufitiye ibanga

Ngo uzamubabaza kugeza arundutse.

 

Turabasaba kugirana ibanga

Za nka twanze kuzimuharira

Twibaza niba warahamagawe

Ahubwo we yatugoreweho.

Ese wabona ikintu umuhemba

Mugende ariko mwarakahanyujije

Tugira amashyushyu y’ibirori byanyu

Tutazi yuko uri nyamujya iriya n’ino.

 

Turabakumbuye have mwitetera

We na n’ubu aguhoza ku munwa

Ubwo ni uko uba umwuzuye umutima

Ese nawe ubwo ujya ukozaho agatima.

 

Amafoto ntamumara urukumbuzi

Indabyo na zo ntizamumara intimba

Amashusho ntamumara ishavu

Ngo amasengesho ntacyo amumariye.

 

Ni wowe wenyine x2

Ni wowe wenyine ushobora kumuhoza

Ni wowe wenyine x2

Ni wowe wenyine ushobora kumuhoza

 

 

 

Texte  Kajyibwami Félicien

Musique et chant JB Byumvuhore

 

 

 

 

 

 

Tuzabihasiga

 

 

 

Iby’isi tubigize dute bantu mufite ubwenge

Ko ndeba iyi si ifite umugambi wo kudusiga

Udakuyemo ake karenge ziramwirenganye

Kandi uzagira ngo ejo azavuga sinamenye

 

Oooo Dawe Ruremabintu

Dawe umenye abana bawe uterereyo utwatsi.

 

Nize amashuri menshi cyane nshyiraho n’ikirenga

Nategetse imbaga y’abantu bakanyubaha cyane

Ariko sinigeze nezerwa habe na gato

Abaririra ubutegetsi musubizeyo amaso.

 

Nashoye imari nyinshi cyane nanjye mba umucuruzi

Naguze amamodoka menshi ngura n’amazu menshi

Ariko sinigeze nezerwa habe na busa

Ifaranga ni ryiza ni uko utarirya ngo urihage.

 

Aha nshuti ndagira ngo dusubize amaso inyuma

Buri wese aragenda uyiruka ku gafaranga

Bizamugeza se ku ki ko azapfa atayamaze

Icyo nsaba ni uko twazajya tubonaho twese.

 

Twavutse twambaye ubusa tuzapfa twambaye ubundi

Bamwe batangira urugendo abandi barusoza

Ibyo twasanze hano ku isi tuzabihasiga

Ni ubusa gusa gusa buteranya abarutuye.

 

Abumva cyo nimwumve abarora cyo nimuhe amaso

Ni impamo nitwidagadure ariko dutekereze

Amajyambere n’urukundo birimwo amahoro

Naho ibindi byo tubireke dufatanye urugendo.

 

wa

Abana banjye aho batuye sinahamenya

N’abaje kunsura simenye ko ari abanjye

 

Akagwa sinkikanywa kave he bana banjye

Ninywera itabi inkono yanjye ntiva mu kanwa

Singitarama ku manwa habe na nijoro

Rya jabo nari mfite riragatabwa.

 

Umugore wanjye we yagiye hakibona

Yapfuye akiri muto bintera agahinda

Ubwo se iyo aba aretse tukazaba tujyana

None abo yansigiye banteye umugongo.

 

Cyo rero bana banjye dore igihe ni gito

Ibyanjye muzabirye ariko mwongere ibindi

Ntimuziyandarike ngo muzihe rubanda

Mbaraze urukundo mbateye amata meza

 

Mubeho kandi musigarane amahoro X2

Créer un site gratuit avec e-monsite - Signaler un contenu illicite sur ce site